आमची टिम

वारकरी संप्रदायाप्रमाणे कोणत्याही मानधनाशिवाय, लोभाशिवाय चालणारी "मिशन ५००" ही एक लोकचळवळ आहे. वारकरी संप्रदाय ही महाराष्ट्रातीलच नाही तर जगातील सर्वांत मोठ्या सामाजिक चळवळींपैकी एक आहे. लाखोंच्या संख्येने दरवर्षी निघणारी वारी हे एक आश्चर्य आहे. या ठिकाणी आयोजक, संयोजक कोणी नसतो. कोणी नेता नसतो, ना कोणी कार्यकर्ता. सगळे समान. धर्म, जात, लिंग, वंश असा कोणताच भेद नसतो. स्वयंप्रेरणेने लोक एकत्र येतात. वाजत, गाजत, नाचत दिंड्या काढतात. गावोगावी कीर्तन करतात, लोकजागृती करतात. यात पैसा लागत नाही आणि भ्रष्टाचारही होऊ शकत नाही. तशाच पद्धतीने 'पाण्याची वारी' चाळीसगावच्या गावागावात नेण्याचे काम आमच्या टीमने केले. मानपान, प्रतिष्ठा, सत्कार, अध्यक्ष, प्रमुख पाहुणे हे विषय टळुन, लोकांमध्ये मिसळून, जमिनीवर लोकांसोबत खाली बसून प्रबोधन केले. लोकांमध्ये स्वतः काम करण्याचा विश्वास निर्माण करुन निर्णय आणि नियोजन प्रक्रीयेसह काम सुपु्र्द केले.